tebes.
Se karik hau iha koragem hau hakarak tebes hakerek karta ida hatoo ba maun boot Xanana Gusmão.
Iha karta laran hau hakarak hakerek liafuan hanesan ne:
Maun boot Xanana Gusmão,
nebe mak ami povo Timor respeito tebes, ho haraik aan hau hakarak hatoo ba ita, hau nudar povo kiik sente triste tebes ho situasaun politika nebe akontese iha ita nian rai. Maske hau laduun komprende didiak politika nebe maun boot sira halo dadauk.Hau hatene deit husi media hanesan TV no Facebook. Balun dehan, VII Governo la tuir konstituisaun, balun dehan, VII Governo forma tuir dalan legal.
Mas pronto, tuir hau nia hanoin nebe simples, katak VII Governo forma tuir Konstituisaun RDTL maske minoria no laiha força iha parlamentar maibe iha programa nebe diak tebes e sei halo Timor sai buras liu. Ami nudar povo hakarak tebes Governo foun atu bele halo mudansa nebe signifikante ba povo timor tomak. Durante tinan 10 iha maun boot nia ukun, ami konsidera no rekonhese katak maun boot halo ona buat barak maibe iha periodo ida ne ami hakarak tebes Governo foun atu halo buat foun no sai diak liutan. Ezemplo: hanesan estrada parte ba Viqueque. Hau nudar Viqueque oan sente triste tebes hare estrada ba Viqueque. Nunee, ho haraik aan hau husu ba maun boot, favor ida fo netik tempo ba Governo foun ida ne hodi halao lai programa nebe planeadu tiha ona hodi fo beneficio ba povo.
Karik lao ladiak ou la halao programa nebe iha, maun boot bele hasé ou fo atensaun ba governo liu husi deputadus sira husi parte AMP.
Karik governo la halao nafatin programa sira ne, maun boot bele hatun governo liu husi dalan legal.
Makne deit maun boot, buat hotu iha ita boot nia liman. Ami nia halerik no ami nia matawen so maun boot mak bele hapara liu husi dalan
FO APOIO BA VII GOVERNO hodi halao nia programa.
Obrigado maun boot,
Maromak hela nafatin ho ita.
Karik hau iha koragem hau hakarak manda tiha karta ne ba maun boot. Maibe hau tauk, hau tauk maun boot hirus, hau lakohi maun boot dehan: "labarik beikten lahatene buat ida mak hakarak hanorin fali politika ba ema boot".
Mas pronto ida ne mak hau nia halerik.